Karakoonana Dinachari

ಕಾರಕೂನನ ದಿನಚರಿ

ಬೆಳಗಾದ ಮೇಲೆ ಎದ್ದು

ತಿರುಸಿದರೆ ಮನೆ ನಲ್ಲಿ

ಬುಸುಗುಡುತ್ತ ಮಾಡಿತು ಸ್ಟ್ರೈಕು

ಬೀದಿಯಲ್ಲಿ ಕ್ಯೂ  ನಿಂತು

ಹೊಡೆದರೆ ಕೈ ಪಂಪು

ಕಣ್ಣೀರ ಸುರಿಸಿ ಹಾಡಿತು ಕ್ವಾಂಕು ಕ್ವಾಂಕು!

ಸ್ನಾನದ ಶಾಸ್ತ್ರ ಮುಗಿಸಿ

ದೇವರ ಫೋಟೋಗೆ ನಮಿಸಿ

ಬೆಳೆಸಿದ ಪಕ್ಕದ ದರ್ಶಿನಿಗೆ ಪಾದ .

ರಾಯರ ಫೋಟೊ ನೋಡಿ

ಭಕ್ತಿಯಲಿ  ನಮಸ್ಕಾರ ಮಾಡಿ

ಹೀರಿದ  ಬುರು ಬುರು ಕಾಫೀ ಸ್ವಾದ

ಕೆಂಪು ಬಸ್ ನೋಡಿ

ಗಡಿಬಿಡಿಯಲಿ   ಓಡಿ

ಆಫೀಸ್ ಸೇರಲು ಆಗಿತ್ತು ಗಂಟೆ ಹತ್ತು.

ಹಳೆ ಕಡತ ತೆಗೆದು

ಧೂಳು ಜಾಡಿಸಿ ಬಡಿದು

ಕುರ್ಚಿಯಲಿ ಕುಳಿತರೆ ಆಗಿತ್ತು ಬಲು  ಸುಸ್ತು .

ದೊಡ್ಡ ಮೇಜ ಮುಂದೆ

ಹಳೆ ಕಡತಗಳ ಹಿಂದೆ

ಕಾಲ್ಚಾಚಿ ಕುಳಿತರೆ ಬಂದಿತು ಸುಖ ನಿದ್ದೆ.

ದೂರದ ಹಳ್ಳಿಯಿಂದ

ಮುದುಕನೊಬ್ಬ ಬಂದ

ಏಳಿಸಿ   ಕೆಡಿಸಿದ  ಅವನ ಸೊಂಪಾದ ನಿದ್ದೆ.

ಮುದುಕಪ್ಪನ್ನ ನೋಡಿ

ಕಾಫಿಗೆ ಆರ್ಡರ್ ಮಾಡಿ

ಕಾಫಿ ಕುಡಿಯುತ ಕೇಳಿದ ನಿಮದ್ಯಾವ ಕಡತ

ಮುದುಕಪ್ಪ ವರಿಸುತ ಬೆವರು

ಹೊಗಳಿದ ನೀವೆಷ್ಟು ಒಳ್ಳೇರು

ಕೇಳಿದ ವಿಲೇವಾರಿ ಎಂದಿಗೆ ನನ್ನ ಪೆನ್ಷನ್ ಕಡತ.

ಕಣ್ಣು ಸನ್ನೆಯಲ್ಲಿ ಹೇಳಿ

ಬಾಯಿ ಬಿಟ್ಟು ಕೇಳಿ 

ಆದರೂ ಕೊಡಲಿಲ್ಲ ಮುದುಕ ಕಾಫಿ ಬಿಲ್ಲು.

ಮಗಳ ಮದುವೆಯ ಗೋಳು

ಹೆಂಡತಿಯ ಕಾಹಿಲೆ ಗೋಳು

 ಬರದು ಬಾಯಿಂದ ಮಾಮೂಲಿ ಸೊಲ್ಲು!  

ಮುದುಕನ ಗೋಳಿನ ಕೊರೆತ

ಅದರಿಂದ ಜೇಬಿಗೆ ಆದ ಕಡಿತ

ಬೇಸತ್ತು ಕುಳಿತನಾತ  ತಲೆಮೇಲೆ ಕೈಹೊತ್ತು.

ಬನ್ನಿ ಮುಂದಿನವಾರ

ಮಾತಲ್ಲಿ ತುಂಬಿತ್ತು ಖಾರ

ಮುದುಕ ನಮಿಸಿ ಹೊರಟ ಮನದಲ್ಲಿ ಆಸೆಯ ಹೊತ್ತು .

ಬಂದ ಮುದ್ಕ ಹಲವು ಬಾರಿ
ಹೇಳಿದನಿವ ನೆಪ ಪ್ರತಿಸಾರಿ
ಧೂಳು ಕುಡಿದು ಕುಳಿತಿತ್ತು  ಕಡತ ಆಗದೆ ವಿಲೇವಾರಿ .
ನಿಂತು ಹೋಯ್ತು ಮಗಳ ಮದುವೆ
ಗುಣವಾಗಲಿಲ್ಲ  ಹೆಂಡ್ತಿ ಕಾಹಿಲೆ
ತಿರುಗಿ ತಿರುಗಿ ಸಾಕಾಗಿ ಹಿಡಿದನವ  ಮೇಲಿನದಾರಿ  !